jinko mai-e-‘irfan-e-wafa ras na aai

jin ko mai-e-‘irfān-e-vafā raas na aa.ī

un ko kabhī jiine kī adā raas na aa.ī

ik vo ki mayassar hai jinheñ zulm kī tāqat

ik ham ki hameñ koī du'ā raas na aa.ī

pāband-e-vafā merā muqaddar hai azal se

mujh ko magar apnī hī vafā raas na aa.ī

āsūda-e-duniyā mujhe sab kahte haiñ lekin

duniyā mujhe ab tak ba-ḳhudā raas na aa.ī

jis bazm se ik rabt hai ab tak mire dil ko

us bazm kī is dil ko fazā raas na aa.ī

us dil kī jahāñ meñ koī qīmat nahīñ jis ko

sāz-e-ġham-e-hastī kī sadā raas na aa.ī

jo shahr ki 'bāsit' kī vafāoñ kā chaman thā

us shahr kī 'bāsit' ko havā raas na aa.ī

jin ko mai-e-‘irfan-e-wafa ras na aai

un ko kabhi jine ki ada ras na aai

ek wo ki mayassar hai jinhen zulm ki taqat

ek hum ki hamein koi du'a ras na aai

paband-e-wafa mera muqaddar hai azal se

mujh ko magar apni hi wafa ras na aai

aasuda-e-duniya mujhe sab kahte hain lekin

duniya mujhe ab tak ba-KHuda ras na aai

jis bazm se ek rabt hai ab tak mere dil ko

us bazm ki is dil ko faza ras na aai

us dil ki jahan mein koi qimat nahin jis ko

saz-e-gham-e-hasti ki sada ras na aai

jo shahr ki 'basit' ki wafaon ka chaman tha

us shahr ki 'basit' ko hawa ras na aai