جن کو مئے عرفان وفا راس نہ آئی

جن کو مئے عرفان وفا راس نہ آئی

ان کو کبھی جینے کی ادا راس نہ آئی

اک وہ کہ میسر ہے جنہیں ظلم کی طاقت

اک ہم کہ ہمیں کوئی دعا راس نہ آئی

پابند وفا میرا مقدر ہے ازل سے

مجھ کو مگر اپنی ہی وفا راس نہ آئی

آسودۂ دنیا مجھے سب کہتے ہیں لیکن

دنیا مجھے اب تک بہ خدا راس نہ آئی

جس بزم سے اک ربط ہے اب تک مرے دل کو

اس بزم کی اس دل کو فضا راس نہ آئی

اس دل کی جہاں میں کوئی قیمت نہیں جس کو

ساز غم ہستی کی صدا راس نہ آئی

جو شہر کہ باسطؔ کی وفاؤں کا چمن تھا

اس شہر کی باسطؔ کو ہوا راس نہ آئی