jinko tauqir-e-rah-o-rasm-e-wafa yaad nahin

jin ko tauqīr-e-rah-o-rasm-e-vafā yaad nahīñ

kyā gila un se kareñ jin ko ḳhudā yaad nahīñ

jaane aa.e bhī the ḳhushbū ke sandese mujh ko

jaane guzrī thī dabe paañv sabā yaad nahīñ

aap ne saath nibhāne kā kiyā thā va.ada

is pe kahte haiñ vo ham se ba-ḳhudā yaad nahīñ

na rahā sham-e-farozāñ meñ bhī vo sho.ala-e-ishq

aur parvānoñ ko marne kī adā yaad nahīñ

ek ummīd-e-masīhā.ī bhī āḳhir kab tak

phir na kahnā hameñ ādāb-e-vafā yaad nahīñ

sho.ala-e-gul se fanā ho ga.ī shabnam 'anjum'

merī hastī huī kyuuñ ḳhaak zarā yaad nahīñ

jin ko tauqir-e-rah-o-rasm-e-wafa yaad nahin

kya gila un se karen jin ko KHuda yaad nahin

jaane aae bhi the KHushbu ke sandese mujh ko

jaane guzri thi dabe panw saba yaad nahin

aap ne sath nibhane ka kiya tha wada

is pe kahte hain wo hum se ba-KHuda yaad nahin

na raha sham-e-farozan mein bhi wo shoala-e-ishq

aur parwanon ko marne ki ada yaad nahin

ek ummid-e-masihai bhi aaKHir kab tak

phir na kahna hamein aadab-e-wafa yaad nahin

shoala-e-gul se fana ho gai shabnam 'anjum'

meri hasti hui kyun KHak zara yaad nahin