jin lashon par jine ka ilzam bhi tha

jin lāshoñ par jiine kā ilzām bhī thā

un kī saf meñ shāmil merā naam bhī thā

tujh se mil kar jab bhī vāpas lauTā huuñ

yaad aayā ki tujh se koī kaam bhī thā

phir vo merī ḳhaak bichhā kar leT gayā

shāyad merā qātil be-ārām bhī thā

ham to likh kar nāhaq hī badnām hue

jin bātoñ kā vaise charchā aam bhī thā

qaht kī aafat saarā gaañv chaaT ga.ī

is gaañv meñ ġhalle kā godām bhī thā

bastī kyā thī sirf sarā-e-ibrat thī

shahr kā shahr vo sharm kā ek maqām bhī thā

log mujhe dīvāna-vār ragaḌte the

mere andar shāyad ek ġhulām bhī thā

raste meñ maujūd ḳhalījeñ nafrat kī

mere paas mohabbat kā paiġhām bhī thā

jin lashon par jine ka ilzam bhi tha

un ki saf mein shamil mera nam bhi tha

tujh se mil kar jab bhi wapas lauTa hun

yaad aaya ki tujh se koi kaam bhi tha

phir wo meri KHak bichha kar leT gaya

shayad mera qatil be-aram bhi tha

hum to likh kar nahaq hi badnam hue

jin baaton ka waise charcha aam bhi tha

qaht ki aafat sara ganw chaT gai

is ganw mein ghalle ka godam bhi tha

basti kya thi sirf sara-e-ibrat thi

shahr ka shahr wo sharm ka ek maqam bhi tha

log mujhe diwana-war ragaDte the

mere andar shayad ek ghulam bhi tha

raste mein maujud KHalijen nafrat ki

mere pas mohabbat ka paigham bhi tha