جن لاشوں پر جینے کا الزام بھی تھا

جن لاشوں پر جینے کا الزام بھی تھا

ان کی صف میں شامل میرا نام بھی تھا

تجھ سے مل کر جب بھی واپس لوٹا ہوں

یاد آیا کہ تجھ سے کوئی کام بھی تھا

پھر وہ میری خاک بچھا کر لیٹ گیا

شاید میرا قاتل بے آرام بھی تھا

ہم تو لکھ کر ناحق ہی بدنام ہوئے

جن باتوں کا ویسے چرچا عام بھی تھا

قحط کی آفت سارا گاؤں چاٹ گئی

اس گاؤں میں غلے کا گودام بھی تھا

بستی کیا تھی صرف سرائے عبرت تھی

شہر کا شہر وہ شرم کا ایک مقام بھی تھا

لوگ مجھے دیوانہ وار رگڑتے تھے

میرے اندر شاید ایک غلام بھی تھا

رستے میں موجود خلیجیں نفرت کی

میرے پاس محبت کا پیغام بھی تھا