جن سے اشارے چشم فسوں گر کے ہو گئے

جن سے اشارے چشم فسوں گر کے ہو گئے

وہ دیکھتے ہی دیکھتے پتھر کے ہو گئے

پروا نہیں جو سیکڑوں کے سر کے ہو گئے

کچھ امتحان تیغ ستم گر کے ہو گئے

حسرت سے دیکھتے رہے ساقی کی ہم نگاہ

محفل میں دور سیکڑوں ساغر کے ہو گئے

ہونٹوں کو چوم لیتا ہے اس مست ناز کے

ساقی یہ حوصلے ترے ساغر کے ہو گئے

کچھ بن پڑا جواب نہ میرے سوال کا

چپ سامنے وہ داور محشر کے ہو گئے

ٹکڑے ہوا تو ٹوٹ پڑی ہر نگاہ شوخ

حصے ہزار اس دل مضطر کے ہو گئے

صدقے شب وصال کے اٹھتی نہیں نگاہ

سب سحر ختم چشم فسوں گر کے ہو گئے

بس یہ ہوا کہ حشر میں اک گرد سی اٹھی

سب فتنے ان کی ایک ہی ٹھوکر کے ہو گئے

کیا جانے کوئی عاشق و معشوق کی ادا

شکوے بھی ہو گئے تو برابر کے ہو گئے