jin se ishaare chashm-e-fusun-gar ke ho gae

jin se ishāre chashm-e-fusūñ-gar ke ho ga.e

vo dekhte hī dekhte patthar ke ho ga.e

parvā nahīñ jo saikḌoñ ke sar ke ho ga.e

kuchh imtihān teġh-e-sitam-gar ke ho ga.e

hasrat se dekhte rahe saaqī kī ham nigāh

mahfil meñ daur saikḌoñ sāġhar ke ho ga.e

hoñToñ ko chuum letā hai us mast-e-nāz ke

saaqī ye hausle tire sāġhar ke ho ga.e

kuchh ban paḌā javāb na mere savāl kā

chup sāmne vo dāvar-e-mahshar ke ho ga.e

TukḌe huā to TuuT paḌī har nigāh-e-shoḳh

hisse hazār is dil-e-muztar ke ho ga.e

sadqe shab-e-visāl ke uThtī nahīñ nigāh

sab sehr ḳhatm chashm-e-fusūñ-gar ke ho ga.e

bas ye huā ki hashr meñ ik gard sī uThī

sab fitne un kī ek hī Thokar ke ho ga.e

kyā jaane koī 'āshiq-o-mā'shūq kī adā

shikve bhī ho ga.e to barābar ke ho ga.e

jin se ishaare chashm-e-fusun-gar ke ho gae

wo dekhte hi dekhte patthar ke ho gae

parwa nahin jo saikDon ke sar ke ho gae

kuchh imtihan tegh-e-sitam-gar ke ho gae

hasrat se dekhte rahe saqi ki hum nigah

mahfil mein daur saikDon saghar ke ho gae

honTon ko chum leta hai us mast-e-naz ke

saqi ye hausle tere saghar ke ho gae

kuchh ban paDa jawab na mere sawal ka

chup samne wo dawar-e-mahshar ke ho gae

TukDe hua to TuT paDi har nigah-e-shoKH

hisse hazar is dil-e-muztar ke ho gae

sadqe shab-e-visal ke uThti nahin nigah

sab sehr KHatm chashm-e-fusun-gar ke ho gae

bas ye hua ki hashr mein ek gard si uThi

sab fitne un ki ek hi Thokar ke ho gae

kya jaane koi 'ashiq-o-ma'shuq ki ada

shikwe bhi ho gae to barabar ke ho gae