jin se shikwa tha wo bahre gunge hain

jin se shikva thā vo bahre gūñge haiñ

ham ko ḳhvāb dikhāne vaale andhe haiñ

vo ḳhāmosh huā to ham par bhed khulā

ḳhāmoshī ke kitne saare lahje haiñ

ek tarah se shikva hai ye paanī se

sahrā meñ ik shaḳhs ne kankar pheñke haiñ

ḳhālī-pan ke karb se shāyad vāqif thā

jis ne mujh ko ḳhālī message bheje haiñ

apne baare meñ bhī thoḌā ilm to ho

ham muddat se apne pīchhe pīchhe haiñ

ham ne apnī kam-fahmī par dastak dī

garche ham ko ilm thā aage taale haiñ

tanhā.ī se mahfil sīñchī jaatī hai

ik bande ke kaafī saare saa.e haiñ

jis manzar meñ 'abdul' āñkheñ ghol chukā

us manzar ko dekhne vaale andhe haiñ

jin se shikwa tha wo bahre gunge hain

hum ko KHwab dikhane wale andhe hain

wo KHamosh hua to hum par bhed khula

KHamoshi ke kitne sare lahje hain

ek tarah se shikwa hai ye pani se

sahra mein ek shaKHs ne kankar phenke hain

KHali-pan ke karb se shayad waqif tha

jis ne mujh ko KHali message bheje hain

apne bare mein bhi thoDa ilm to ho

hum muddat se apne pichhe pichhe hain

hum ne apni kam-fahmi par dastak di

garche hum ko ilm tha aage tale hain

tanhai se mahfil sinchi jati hai

ek bande ke kafi sare sae hain

jis manzar mein 'abdul' aankhen ghol chuka

us manzar ko dekhne wale andhe hain