wo jinko umar bhar suhag ki duaen di gain

vo jin ko umar bhar suhāg kī duā.eñ dī ga.iiñ

sunā hai apnī chūḌiyāñ hī piis piis pī ga.iiñ

bahut hai ye rivāyatoñ kā zahr saarī umar ko

jo talḳhiyāñ hamāre āñchaloñ meñ bāñdh dī ga.iiñ

kabhī na aisī fasl mere gaañv meñ huī ki jab

kusum ke badle chunariyāñ gulāb se rañgī ga.iiñ

vo jin ke pairahan kī ḳhushbueñ havā pe qarz thiiñ

rutoñ kī vo udaas shahzādiyāñ chalī ga.iiñ

in uñgliyoñ ko chūmnā bhī bid.ateñ shumār ho

vo jin se ḳhaak par numū kī āyateñ likhī ga.iiñ

saroñ kā ye lagān ab ke fasl kaun le gayā

ye kis kī khetiyāñ thiiñ aur kis ko sauñp dī ga.iiñ

wo jin ko umar bhar suhag ki duaen di gain

suna hai apni chuDiyan hi pis pis pi gain

bahut hai ye riwayaton ka zahr sari umar ko

jo talKHiyan hamare aanchalon mein bandh di gain

kabhi na aisi fasl mere ganw mein hui ki jab

kusum ke badle chunariyan gulab se rangi gain

wo jin ke pairahan ki KHushbuen hawa pe qarz thin

ruton ki wo udas shahzadiyan chali gain

in ungliyon ko chumna bhi bidaten shumar ho

wo jin se KHak par numu ki aayaten likhi gain

saron ka ye lagan ab ke fasl kaun le gaya

ye kis ki khetiyan thin aur kis ko saunp di gain