jis din talak asar meri aah-o-fughan mein tha

jis din talak asar mirī āh-o-fuġhāñ meñ thā

batlāo kaun chain se soyā jahāñ meñ thā

rakhte the ham baġhal meñ dil-e-garm vo ki bas

paḌ jaatā jis ke naam se chhālā zabāñ meñ thā

āshiq kā kahiyo pahle hī vaañ kaam ho gayā

terā hunūz tiir parī-rū kamāñ meñ thā

ai barq jis kī laakh jahannum the jeb meñ

ek ik sharar vo nāla-e-ātish-fishāñ meñ thā

lākhoñ ke dil ko bātoñ hī bātoñ meñ le gayā

afsūñ kahūñ ki sehr kahūñ kyā bayāñ meñ thā

aayā thā kaun sair ko sach kahiyo andalīb

jo shor al-amāñ kā paḌā gulsitāñ meñ thā

kyā pās-e-ishq hai ki muue par bhī rāz-e-ishq

sar-basta vuuñ hī har qalam-e-ustuḳhvāñ meñ thā

vo garm-e-sarf-e-nāz the vaañ bazm-e-ġhair meñ

sargarm us taraf mirā dil sarf-e-jāñ meñ thā

chūme the kis ke hoñT ki jo marte dam maza

talḳhī ke badle qand kā mere dahāñ meñ thā

kuchh kyā chukā nasīm-e-sahar barg-e-gul pe kal

jhagḌā jo andalīb meñ aur bāġhbāñ meñ thā

haañ vāqa.ī hai tum to na the bazm-e-ġhair meñ

afsūñ mujhī ko paḌh ke diyā barg-e-pāñ meñ thā

bulbul ko baaġh meñ jo taḌapne diyā bhalā

juz ḳhaar us ke aur bhī kuchh āshiyāñ meñ thā

vo nā-tavāñ thā dil-e-āshiq ki jis kā aah

naala kabhī zamīn o kabhī āsmāñ meñ thā

shab ḳhvāb meñ mo.āmla us mah-jabīñ se 'aish'

vo paT gayā jo apne na vahm-o-gumāñ meñ thā

jis din talak asar meri aah-o-fughan mein tha

batlao kaun chain se soya jahan mein tha

rakhte the hum baghal mein dil-e-garm wo ki bas

paD jata jis ke nam se chhaala zaban mein tha

aashiq ka kahiyo pahle hi wan kaam ho gaya

tera hunuz tir pari-ru kaman mein tha

ai barq jis ki lakh jahannum the jeb mein

ek ek sharar wo nala-e-atish-fishan mein tha

lakhon ke dil ko baaton hi baaton mein le gaya

afsun kahun ki sehr kahun kya bayan mein tha

aaya tha kaun sair ko sach kahiyo andalib

jo shor al-aman ka paDa gulsitan mein tha

kya pas-e-ishq hai ki mue par bhi raaz-e-ishq

sar-basta wun hi har qalam-e-ustuKHwan mein tha

wo garm-e-sarf-e-naz the wan bazm-e-ghair mein

sargarm us taraf mera dil sarf-e-jaan mein tha

chume the kis ke honT ki jo marte dam maza

talKHi ke badle qand ka mere dahan mein tha

kuchh kya chuka nasim-e-sahar barg-e-gul pe kal

jhagDa jo andalib mein aur baghban mein tha

han waqai hai tum to na the bazm-e-ghair mein

afsun mujhi ko paDh ke diya barg-e-pan mein tha

bulbul ko bagh mein jo taDapne diya bhala

juz KHar us ke aur bhi kuchh aashiyan mein tha

wo na-tawan tha dil-e-ashiq ki jis ka aah

nala kabhi zamin o kabhi aasman mein tha

shab KHwab mein moamla us mah-jabin se 'aish'

wo paT gaya jo apne na wahm-o-guman mein tha