jis din tum aa ke humse ham-aghosh ho gae

jis din tum aa ke ham se ham-āġhosh ho ga.e

shikve jo dil meñ the so farāmosh ho ga.e

saaqī nahīñ hai sāġhar-e-mai kī hameñ talab

āñkheñ hī terī dekh ke behosh ho ga.e

sunñe ko husn-e-yār kī ḳhūbī ba-rañg-e-gul

a.azā mire badan ke sabhī gosh ho ga.e

karte the apne husn kī tārīf gul-ruḳhāñ

us lāla-rū ko dekh ke ḳhāmosh ho ga.e

ai jaan dekhte hī mujhe duur se tum aaj

ye kaun sī adā thī ki rū-posh ho ga.e

rahte the be-hijāb mire paas jin dinoñ

ve roz haa.e tum ko farāmosh ho ga.e

duniyā o diin kī na rahī ham ko kuchh ḳhabar

hote hī us ke sāmne behosh ho ga.e

'bedār' bas-ki ro.e ham us gul kī yaad meñ

sar-tā-qadam sarishk se gul-posh ho ga.e

jis din tum aa ke hum se ham-aghosh ho gae

shikwe jo dil mein the so faramosh ho gae

saqi nahin hai saghar-e-mai ki hamein talab

aankhen hi teri dekh ke behosh ho gae

sunne ko husn-e-yar ki KHubi ba-rang-e-gul

aaza mere badan ke sabhi gosh ho gae

karte the apne husn ki tarif gul-ruKHan

us lala-ru ko dekh ke KHamosh ho gae

ai jaan dekhte hi mujhe dur se tum aaj

ye kaun si ada thi ki ru-posh ho gae

rahte the be-hijab mere pas jin dinon

we roz hae tum ko faramosh ho gae

duniya o din ki na rahi hum ko kuchh KHabar

hote hi us ke samne behosh ho gae

'bedar' bas-ki roe hum us gul ki yaad mein

sar-ta-qadam sarishk se gul-posh ho gae