جس گلستاں میں بسوں میں وہی ویرانہ بنے

جس گلستاں میں بسوں میں وہی ویرانہ بنے

برق لوٹے وہیں جس جا مرا کاشانہ بنے

تجھ سے کام اتنا تو اے ہمت مردانہ بنے

برق لوٹی ہے جہاں پھر وہیں کاشانہ بنے

ہم تو مٹ کر بھی نہ خشت خم مے خانہ بنے

ہم سے خاک اچھی ہے جس خاک سے پیمانہ بنے

آشنا ہو وہ ترا سب سے جو بیگانہ بنے

ہوش اسی کے ہیں بجا جو ترا دیوانہ بنے

تیرے ہاتھوں سے اگر شمع لحد ہو روشن

اڑ کے ہر ذرہ مری قبر کا پروانہ بنے

شعلۂ حسن کی یوں سیر کہاں سب کو نصیب

قسمت اس خاک کی جس خاک سے پروانہ بنے

دل شکستوں کو بھی ہے محفل ساقی میں جگہ

ٹوٹ بھی جائے اگر شیشہ تو پیمانہ بنے

اے تصور ہے نہاں شان سلیماں تجھ میں

تو اگر چاہے تو گھر میرا پری خانہ بنے

شائقؔ اس بزم میں ہم صورت تصویر ہیں چپ

کیا کریں بات جہاں بات کا افسانہ بنے