jis gulistan mein basun main wahi virana bane

jis gulistāñ meñ basūñ maiñ vahī vīrāna bane

barq lauTe vahīñ jis jā mirā kāshāna bane

tujh se kaam itnā to ai himmat-e-mardāna bane

barq lauTī hai jahāñ phir vahīñ kāshāna bane

ham to miT kar bhī na ḳhisht-e-ḳhum-e-mai-ḳhāna bane

ham se ḳhaak achchhī hai jis ḳhaak se paimāna bane

āshnā ho vo tirā sab se jo begāna bane

hosh usī ke haiñ bajā jo tirā dīvāna bane

tere hāthoñ se agar sham-e-lahad ho raushan

uḌ ke har zarra mirī qabr kā parvāna bane

sho.ala-e-husn kī yuuñ sair kahāñ sab ko nasīb

qismat us ḳhaak kī jis ḳhaak se parvāna bane

dil shikastoñ ko bhī hai mahfil-e-sāqī meñ jagah

TuuT bhī jaa.e agar shīsha to paimāna bane

ai tasavvur hai nihāñ shān-e-sulaimāñ tujh meñ

tū agar chāhe to ghar merā parī-ḳhāna bane

'shā.eq' is bazm meñ ham sūrat-e-tasvīr haiñ chup

kyā kareñ baat jahāñ baat kā afsāna bane

jis gulistan mein basun main wahi virana bane

barq lauTe wahin jis ja mera kashana bane

tujh se kaam itna to ai himmat-e-mardana bane

barq lauTi hai jahan phir wahin kashana bane

hum to miT kar bhi na KHisht-e-KHum-e-mai-KHana bane

hum se KHak achchhi hai jis KHak se paimana bane

aashna ho wo tera sab se jo begana bane

hosh usi ke hain baja jo tera diwana bane

tere hathon se agar sham-e-lahad ho raushan

uD ke har zarra meri qabr ka parwana bane

shoala-e-husn ki yun sair kahan sab ko nasib

qismat us KHak ki jis KHak se parwana bane

dil shikaston ko bhi hai mahfil-e-saqi mein jagah

TuT bhi jae agar shisha to paimana bane

ai tasawwur hai nihan shan-e-sulaiman tujh mein

tu agar chahe to ghar mera pari-KHana bane

'shaeq' is bazm mein hum surat-e-taswir hain chup

kya karen baat jahan baat ka afsana bane