jis ka dil aaina nahin hota

jis kā dil aa.ina nahīñ hotā

us pe fazl-e-ḳhudā nahīñ hotā

maut bar-haq agar nahīñ hotī

kaun bandā ḳhudā nahīñ hotā

zid jo muusā ne kī nahīñ hotī

tuur hargiz jalā nahīñ hotā

ḳhud na chāho to baat dīgar hai

varna chāho to kyā nahīñ hotā

ġham se hotī na phir shanāsā.ī

dil jo tum se lagā nahīñ hotā

log hote haiñ sab ḳhafā lekin

koī tum sā ḳhafā nahīñ hotā

toḌ dete haiñ log dil kaise

dard un ko zarā nahīñ hotā

ab to har pal mire taḳhayyul meñ

koī tere sivā nahīñ hotā

tab davā.eñ hī kaam aatī haiñ

jab davā se bhalā nahīñ hotā

'ishq ne'mat ḳhudā kī hai yaaro

'ishq karnā burā nahīñ hotā

dost ban ke daġhā jo de 'shāriq'

vo kisī kā sagā nahīñ hotā

jis ka dil aaina nahin hota

us pe fazl-e-KHuda nahin hota

maut bar-haq agar nahin hoti

kaun banda KHuda nahin hota

zid jo musa ne ki nahin hoti

tur hargiz jala nahin hota

KHud na chaho to baat digar hai

warna chaho to kya nahin hota

gham se hoti na phir shanasai

dil jo tum se laga nahin hota

log hote hain sab KHafa lekin

koi tum sa KHafa nahin hota

toD dete hain log dil kaise

dard un ko zara nahin hota

ab to har pal mere taKHayyul mein

koi tere siwa nahin hota

tab dawaen hi kaam aati hain

jab dawa se bhala nahin hota

'ishq ne'mat KHuda ki hai yaro

'ishq karna bura nahin hota

dost ban ke dagha jo de 'shaariq'

wo kisi ka saga nahin hota