jis ki duniya mein sabhi kuchh hai siwae kanTe

jis kī duniyā meñ sabhī kuchh hai sivā.e kāñTe

phuul ke saath vo joḌe meñ lagā.e kāñTe

zindagī meñ mujhe har daur meñ bhaa.e kāñTe

jab bhī aa.e mire dāman meñ to aa.e kāñTe

aish-o-ishrat meñ bhī zehnoñ meñ basā.e kāñTe

yuuñ samajh lo ki jahannum se bachā.e kāñTe

mujh ko dushman se shikāyat na raqīboñ se gila

mere apnoñ ne mirī rah meñ bichhā.e kāñTe

merī ik arz pe ġhusse se dikhā.ī āñkheñ

mere mahbūb ne bhī mujh ko dikhā.e kāñTe

koī to ho ki jo dushman ko biThā.e sar par

ya.anī merī tarah palkoñ se uThā.e kāñTe

aa ga.ī jin meñ qalandar kī sifat ai 'shākir'

pheñk kar taaj jabīnoñ pe sajā.e kāñTe

jis ki duniya mein sabhi kuchh hai siwae kanTe

phul ke sath wo joDe mein lagae kanTe

zindagi mein mujhe har daur mein bhae kanTe

jab bhi aae mere daman mein to aae kanTe

aish-o-ishrat mein bhi zehnon mein basae kanTe

yun samajh lo ki jahannum se bachae kanTe

mujh ko dushman se shikayat na raqibon se gila

mere apnon ne meri rah mein bichhae kanTe

meri ek arz pe ghusse se dikhai aankhen

mere mahbub ne bhi mujh ko dikhae kanTe

koi to ho ki jo dushman ko biThae sar par

yani meri tarah palkon se uThae kanTe

aa gai jin mein qalandar ki sifat ai 'shakir'

phenk kar taj jabinon pe sajae kanTe