jis ki KHatir sara zamana chhoD diya

jis kī ḳhātir saarā zamāna chhoḌ diyā

us ne merā phone uThānā chhoḌ diyā

saarī saarī raat satānā chhoḌ diyā

tum ne kyoñ ḳhvāboñ meñ aanā chhoḌ diyā

un kī ġhalat-fahmī ko kahāñ tak duur kareñ

rūThe huoñ ko ham ne manānā chhoḌ diyā

jab se haqīqat sāmne aa.ī ḳhvāboñ kī

tasvīroñ se dil bahlānā chhoḌ diyā

pūchh rahī haiñ aa kar maujeñ sāhil se

us ne kyoñ panghaT par aanā chhoḌ diyā

har din is ke pāgal-pan se tang aa kar

maiñ ne is dil ko samjhānā chhoḌ diyā

dost banā kar dhoka diyā jab se us ne

ham ne ziyāda dost banānā chhoḌ diyā

'ālam' jin se mil na sakā dil barsoñ se

ham ne un se haath milānā chhoḌ diyā

jis ki KHatir sara zamana chhoD diya

us ne mera phone uThana chhoD diya

sari sari raat satana chhoD diya

tum ne kyon KHwabon mein aana chhoD diya

un ki ghalat-fahmi ko kahan tak dur karen

ruThe huon ko hum ne manana chhoD diya

jab se haqiqat samne aai KHwabon ki

taswiron se dil bahlana chhoD diya

puchh rahi hain aa kar maujen sahil se

us ne kyon panghaT par aana chhoD diya

har din is ke pagal-pan se tang aa kar

main ne is dil ko samjhana chhoD diya

dost bana kar dhoka diya jab se us ne

hum ne ziyaada dost banana chhoD diya

'alam' jin se mil na saka dil barson se

hum ne un se hath milana chhoD diya