jis ki koi tabir na ho wo KHwab dikhane aa jate hain

jis kī koī tā'bīr na ho vo ḳhvāb dikhāne aa jaate haiñ

aanā chāheñ to aksar vo kisī bahāne aa jaate haiñ

aate haiñ to aur ziyāda pareshān kar jaate haiñ vo

log samajhte haiñ ki hamārā jī bahlāne aa jaate haiñ

rasta kuchh hamvār to kuchh dushvār bhī karte jaate haiñ vo

ik dīvār girāne to ik na.ī uThāne aa jaate haiñ

bahut sañvārī suljhī huī zulfoñ vaale dar-asl hamārī

uljhī huī tabī'at ko kuchh aur uljhāne aa jaate haiñ

apne aap ko ḳhush rakhne kī karte rahte haiñ koshish bhī

sochte sochte dil meñ ḳhauf bhī na.e purāne aa jaate haiñ

yuuñ hai 'zafar' ahbāb kī mahfil meñ apnā ye ānā-jānā

jo mauzūñ hī nahīñ hue vo she'r sunāne aa jaate haiñ

jis ki koi ta'bir na ho wo KHwab dikhane aa jate hain

aana chahen to aksar wo kisi bahane aa jate hain

aate hain to aur ziyaada pareshan kar jate hain wo

log samajhte hain ki hamara ji bahlane aa jate hain

rasta kuchh hamwar to kuchh dushwar bhi karte jate hain wo

ek diwar girane to ek nai uThane aa jate hain

bahut sanwari suljhi hui zulfon wale dar-asl hamari

uljhi hui tabi'at ko kuchh aur uljhane aa jate hain

apne aap ko KHush rakhne ki karte rahte hain koshish bhi

sochte sochte dil mein KHauf bhi nae purane aa jate hain

yun hai 'zafar' ahbab ki mahfil mein apna ye aana-jaana

jo mauzun hi nahin hue wo she'r sunane aa jate hain