جس کی کوئی تعبیر نہ ہو وہ خواب دکھانے آ جاتے ہیں

جس کی کوئی تعبیر نہ ہو وہ خواب دکھانے آ جاتے ہیں

آنا چاہیں تو اکثر وہ کسی بہانے آ جاتے ہیں

آتے ہیں تو اور زیادہ پریشان کر جاتے ہیں وہ

لوگ سمجھتے ہیں کہ ہمارا جی بہلانے آ جاتے ہیں

رستہ کچھ ہموار تو کچھ دشوار بھی کرتے جاتے ہیں وہ

اک دیوار گرانے تو اک نئی اٹھانے آ جاتے ہیں

بہت سنواری سلجھی ہوئی زلفوں والے دراصل ہماری

الجھی ہوئی طبیعت کو کچھ اور الجھانے آ جاتے ہیں

اپنے آپ کو خوش رکھنے کی کرتے رہتے ہیں کوشش بھی

سوچتے سوچتے دل میں خوف بھی نئے پرانے آ جاتے ہیں

یوں ہے ظفرؔ احباب کی محفل میں اپنا یہ آنا جانا

جو موزوں ہی نہیں ہوئے وہ شعر سنانے آ جاتے ہیں