jis ki rahi talash hamesha wo tu na ho

jis kī rahī talāsh hamesha vo tū na ho

mumkin hai tū mile to koī justujū na ho

tū hī batā ye ishq kā hai kaun sā maqām

dil ko ye aarzū hai tirī aarzū na ho

husn-e-tahī-vafā kabhī is phuul ko bhī dekh

jis meñ jamāl-e-rang to ho aur bū na ho

yuuñ hai kisī kī kaifiyat-e-chashm kī havas

jaise kaheñ sharāb nahīñ yā subū na ho

ai dost mere ishq pe tanqīd bhī zarūr

lekin ye soch le ye tirī aabrū na ho

hāthoñ meñ jo khilā hai vo rang-e-hinā sahī

ḳhanjar ko dekh us pe kisī kā lahū na ho

ai zulf phail jā ki numā.ish nahīñ hai ye

hastī kā kyā subūt jo zauq-e-numū na ho

'shaukat' ham us ke dard-e-tamannā ko bhuul jaa.eñ

par vo sitam-zarīf bhī to rū-ba-rū na ho

jis ki rahi talash hamesha wo tu na ho

mumkin hai tu mile to koi justuju na ho

tu hi bata ye ishq ka hai kaun sa maqam

dil ko ye aarzu hai teri aarzu na ho

husn-e-tahi-wafa kabhi is phul ko bhi dekh

jis mein jamal-e-rang to ho aur bu na ho

yun hai kisi ki kaifiyat-e-chashm ki hawas

jaise kahen sharab nahin ya subu na ho

ai dost mere ishq pe tanqid bhi zarur

lekin ye soch le ye teri aabru na ho

hathon mein jo khila hai wo rang-e-hina sahi

KHanjar ko dekh us pe kisi ka lahu na ho

ai zulf phail ja ki numaish nahin hai ye

hasti ka kya subut jo zauq-e-numu na ho

'shaukat' hum us ke dard-e-tamanna ko bhul jaen

par wo sitam-zarif bhi to ru-ba-ru na ho