jis ki tahwil mein TuTa tha sitara dil ka

jis kī tahvīl meñ TuuTā thā sitāra dil kā

haal tak us ne nahīñ pūchhā dobāra dil kā

maiñ mohabbat ke samundar meñ utar aaya huuñ

Duub jaane ko hai ab mujh meñ kināra dil kā

kaash kuchh vaqt tū ruk jaa.e mirī mahfil meñ

kaash ai dost samajh le tū ishāra dil kā

maiñ na kahtā thā mohabbat meñ nahīñ hāsil kuchh

maiñ na kahtā thā ki hai ishq ḳhasāra dil kā

tujh pe martā hai to is dil ko pashemān na kar

kuchh bharam rakh le mohabbat meñ ḳhudārā dil kā

ye jo duniyā hai sahīfa hai koī dhyān se paḌh

ye zamīñ asl meñ hai ek sipāra dil kā

ham ne jitnā bhī kahā dil se kahā hai 'rāshid'

sher meñ lafz nahīñ ḳhuun utārā dil kā

jis ki tahwil mein TuTa tha sitara dil ka

haal tak us ne nahin puchha dobara dil ka

main mohabbat ke samundar mein utar aaya hun

Dub jaane ko hai ab mujh mein kinara dil ka

kash kuchh waqt tu ruk jae meri mahfil mein

kash ai dost samajh le tu ishaara dil ka

main na kahta tha mohabbat mein nahin hasil kuchh

main na kahta tha ki hai ishq KHasara dil ka

tujh pe marta hai to is dil ko pasheman na kar

kuchh bharam rakh le mohabbat mein KHudara dil ka

ye jo duniya hai sahifa hai koi dhyan se paDh

ye zamin asl mein hai ek sipara dil ka

hum ne jitna bhi kaha dil se kaha hai 'rashid'

sher mein lafz nahin KHun utara dil ka