jis ki talab thi mujhko wo rahat kahan mili

jis kī talab thī mujh ko vo rāhat kahāñ milī

tum mil ga.e tumhārī mohabbat kahāñ milī

kyā kyā diye haiñ chashm-e-tasavvur ne bhī fareb

mere ḳhayāl se tirī sūrat kahāñ milī

dil kā dayār-e-husn meñ jā kar milā surāġh

khoī kahāñ thī aur ye daulat kahāñ milī

vo bazm-e-mai-kada ho ki ḳhalvat-gah-e-haram

dil ko ḳhayāl-e-dost fursat kahāñ milī

us ne to ek baar bhī dekhā na pyaar se

mujh ko mirī vafāoñ kī qīmat kahāñ milī

talvoñ se ḳhaar chunte rahe haiñ tamām umr

āvārgān-e-shauq ko rāhat kahāñ milī

kahte haiñ jis ko ishq muqaddar kī baat hai

sab ko ḳhudā ke ghar se ye daulat kahāñ milī

jī to bahal gayā tirī mahfil meñ kuchh magar

mujh ko ġham-e-hayāt se fursat kahāñ milī

guzrā hai dard had se to hañsne lagā huuñ maiñ

'nāsir' vagarna mujh ko masarrat kahāñ milī

jis ki talab thi mujh ko wo rahat kahan mili

tum mil gae tumhaari mohabbat kahan mili

kya kya diye hain chashm-e-tasawwur ne bhi fareb

mere KHayal se teri surat kahan mili

dil ka dayar-e-husn mein ja kar mila suragh

khoi kahan thi aur ye daulat kahan mili

wo bazm-e-mai-kada ho ki KHalwat-gah-e-haram

dil ko KHayal-e-dost fursat kahan mili

us ne to ek bar bhi dekha na pyar se

mujh ko meri wafaon ki qimat kahan mili

talwon se KHar chunte rahe hain tamam umr

aawargan-e-shauq ko rahat kahan mili

kahte hain jis ko ishq muqaddar ki baat hai

sab ko KHuda ke ghar se ye daulat kahan mili

ji to bahal gaya teri mahfil mein kuchh magar

mujh ko gham-e-hayat se fursat kahan mili

guzra hai dard had se to hansne laga hun main

'nasir' wagarna mujh ko masarrat kahan mili