جس کو اپنا بنا لیا تو نے

جس کو اپنا بنا لیا تو نے

اس کو سب کچھ عطا کیا تو نے

اے ستم گر یہ کیا کیا تو نے

اپنا گھر بھی جلا لیا تو نے

گمرہی میں پڑے ہوئے تھے لوگ

منزلوں کا پتہ دیا تو نے

پیچھے پیچھے جو میرے چلتے تھے

ان کو آگے بڑھا دیا تو نے

پارسائی کا جس کو دعویٰ تھا

اس کو مے کش بنا دیا تو نے

بغض و نفرت کا یہ نتیجہ ہے

دوستوں کو بھلا دیا تو نے

ہر کسی کو حقیر سمجھے ہے

خود کو کتنا گرا دیا تو نے

فکر منزل کی جب ہوئی راہیؔ

نقش پا ہی مٹا دیا تو نے