jis ko dayar-e-ishq se wabastagi mili

jis ko dayār-e-'ishq se vābastagī milī

tārīkiyoñ meñ us ko na.ī raushnī milī

ThanDī thī jis ke siine meñ har aag der se

nafrat kī aag mujh ko vahāñ bhī lagī milī

apnoñ ko chhoḌ dete haiñ ġhairoñ ke vāste

logoñ meñ aaj sab se baḌī ye kamī milī

har rāste pe maut kā saaya thā duur tak

har moḌ par sisaktī huī zindagī milī

rishvat to saare logoñ kī imdād ho ga.ī

jab se havāla case kī hai Diary milī

hāsil nahīñ sukūn to daulat ko kyā kareñ

daulat ke saath ham ko 'ajab muflisī milī

paisa har ek chiiz kā mehvar hai āj-kal

duniyā isī pe aaj mujhe ghūmtī milī

jis ne irāda kar liyā nekī kā raah meñ

manzil hamesha un ke qadam chūmtī milī

jis ne banā.īñ ġhairoñ kī ūñchī 'imārateñ

rahne ke vāste na use jhoñpḌī milī

ghar aa.e saare din kī thakan le ke ai 'kashish'

bachchoñ ko dekhte hī na.ī tāzgī milī

jis ko dayar-e-'ishq se wabastagi mili

tarikiyon mein us ko nai raushni mili

ThanDi thi jis ke sine mein har aag der se

nafrat ki aag mujh ko wahan bhi lagi mili

apnon ko chhoD dete hain ghairon ke waste

logon mein aaj sab se baDi ye kami mili

har raste pe maut ka saya tha dur tak

har moD par sisakti hui zindagi mili

rishwat to sare logon ki imdad ho gai

jab se hawala case ki hai Diary mili

hasil nahin sukun to daulat ko kya karen

daulat ke sath hum ko 'ajab muflisi mili

paisa har ek chiz ka mehwar hai aaj-kal

duniya isi pe aaj mujhe ghumti mili

jis ne irada kar liya neki ka rah mein

manzil hamesha un ke qadam chumti mili

jis ne banain ghairon ki unchi 'imaraten

rahne ke waste na use jhonpDi mili

ghar aae sare din ki thakan le ke ai 'kashish'

bachchon ko dekhte hi nai tazgi mili