jis ko dekhe bina qarar nahin

jis ko dekhe binā qarār nahīñ

kaise kah deñ ki us se pyaar nahīñ

ruḳh pe tere agar nikhār nahīñ

tū bahār ai sanam bahār nahīñ

is meñ sūd-o-ziyāñ kā kar na hisāb

ishq ibādat hai kārobār nahīñ

rok lo tum se gar ye ruktā hai

dil pe merā to iḳhtiyār nahīñ

go musībat meñ sab nadārad the

varna ishrat meñ kaun yaar nahīñ

kyoñ na jī-bhar ke ro liyā jaa.e

paas jab koī ġham-gusār nahīñ

chup rahūñ kaise tak ke zulm-o-sitam

aadmī huuñ koī mazār nahīñ

hājateñ haiñ ginī-chunī sab kī

hasratoñ kā koī shumār nahīñ

kyā yaqīñ ahd-e-vasl kā ai 'sadā'

ziist kā hī jab e.atibār nahīñ

jis ko dekhe bina qarar nahin

kaise kah den ki us se pyar nahin

ruKH pe tere agar nikhaar nahin

tu bahaar ai sanam bahaar nahin

is mein sud-o-ziyan ka kar na hisab

ishq ibaadat hai karobar nahin

rok lo tum se gar ye rukta hai

dil pe mera to iKHtiyar nahin

go musibat mein sab nadarad the

warna ishrat mein kaun yar nahin

kyon na ji-bhar ke ro liya jae

pas jab koi gham-gusar nahin

chup rahun kaise tak ke zulm-o-sitam

aadmi hun koi mazar nahin

hajaten hain gini-chuni sab ki

hasraton ka koi shumar nahin

kya yaqin ahd-e-wasl ka ai 'sada'

zist ka hi jab eatibar nahin