jis ko dekho wahi aawara-o-saudai hai

jis ko dekho vahī āvāra-o-saudā.ī hai

zindagī hai ki kisī dasht kī pahnā.ī hai

sho.ala-e-ġham ko rag-e-jāñ meñ kiyā jazb to phir

har nazar sūrat-e-ḳhurshīd nazar aa.ī hai

Duub kar dil meñ ubhartī hai koī mauj-e-ḳhayāl

abr chhāyā hai kabhī barq sī lahrā.ī hai

giit ke ruup meñ pāband bahāroñ kī fazā

chaman-e-dil meñ mire aur nikhar aa.ī hai

lazzat-e-ishq se bharpūr ġham-e-dil kī sadā

parda-e-shab meñ ka.ī chāñd uḌā laa.ī hai

shabnamī aañkh se dekho to chaman kī jānib

sīna-e-gul meñ sharāroñ ne numū paa.ī hai

sochtā huuñ ki zamāne se nikal kar aage

phir vahī maiñ huuñ vahī gosha-e-tanhā.ī hai

apne hone kī haqīqat kā yaqīñ hai lekin

aañkh kyuuñ jalva-e-hastī kī tamannā.ī hai

ye ajab silsila-e-qaid-e-nazar hai ki 'nadīm'

har nazar apnī hī duniyā kī tamāshā.ī hai

jis ko dekho wahi aawara-o-saudai hai

zindagi hai ki kisi dasht ki pahnai hai

shoala-e-gham ko rag-e-jaan mein kiya jazb to phir

har nazar surat-e-KHurshid nazar aai hai

Dub kar dil mein ubharti hai koi mauj-e-KHayal

abr chhaya hai kabhi barq si lahrai hai

git ke rup mein paband bahaaron ki faza

chaman-e-dil mein mere aur nikhar aai hai

lazzat-e-ishq se bharpur gham-e-dil ki sada

parda-e-shab mein kai chand uDa lai hai

shabnami aankh se dekho to chaman ki jaanib

sina-e-gul mein shararon ne numu pai hai

sochta hun ki zamane se nikal kar aage

phir wahi main hun wahi gosha-e-tanhai hai

apne hone ki haqiqat ka yaqin hai lekin

aankh kyun jalwa-e-hasti ki tamannai hai

ye ajab silsila-e-qaid-e-nazar hai ki 'nadim'

har nazar apni hi duniya ki tamashai hai