jis ko jitna hosh hai itna hi wo diwana hai

jis ko jitnā hosh hai itnā hī vo dīvāna hai

kyā kaheñ dīvāna-pan hī hosh kā paimāna hai

jis ke dil meñ imtiyāz-e-ka.aba-o-but-ḳhāna hai

manziloñ duur us se rāh-e-manzil-e-jānāna hai

dahr meñ lailā-e-āzādī kā jo dīvāna hai

us kā har naqsh-e-qadam mere liye but-ḳhāna hai

is jahāñ kī baat ho yā us jahāñ kī baat ho

ye bhī qissa hai terā vo bhī terā afsāna hai

is ko daulat kā nasha hai us ko izzat kā ḳhumār

har koī mad.hosh hai duniyā bhī kyā mai-ḳhāna hai

chashm-e-haq-bīñ kah rahī hai ye zabān-e-hāl se

ḳhvāb hai duniyā kisī kā yā koī afsāna hai

zarra zarra meñ nazar aatā hai jis ko husn-e-dost

vo jahāñ meñ be-niyāz-e-ka.aba-o-but-ḳhāna hai

jis meñ jitnī hai sharāfat us qadar jhuktā hai vo

inkisārī dar-haqīqat zarf kā paimāna hai

dil sahī lekin vo dil koī diloñ meñ dil nahīñ

dard se nā-āshnā ulfat se jo begāna hai

be-sabātī-e-jahāñ par kaun kartā hai yaqīñ

ham samajh kar bhī na ye samjhe ki ye afsāna hai

aa rahī haiñ dil se ġhāfil ye sadā.eñ dam-ba-dam

daulat-e-duniyā ke pīchhe kis liye dīvāna hai

aabrū jaa.e vatan kī aur tum dekhā karo

kyā yahī ai nau-javāno himmat-e-mardāna hai

jis kā maz.hab ban gayā ho ḳhidmat-e-ḳhalq-e-ḳhudā

us ko 'sūfī' is se kyā ye ḳhvesh ye begāna hai

kaif taarī hai dimāġh-o-dil pe us ke kis qadar

jām-o-hiddat pī ke 'sūfī' kis qadar mastāna hai

jis ko jitna hosh hai itna hi wo diwana hai

kya kahen diwana-pan hi hosh ka paimana hai

jis ke dil mein imtiyaz-e-kaba-o-but-KHana hai

manzilon dur us se rah-e-manzil-e-jaanana hai

dahr mein laila-e-azadi ka jo diwana hai

us ka har naqsh-e-qadam mere liye but-KHana hai

is jahan ki baat ho ya us jahan ki baat ho

ye bhi qissa hai tera wo bhi tera afsana hai

is ko daulat ka nasha hai us ko izzat ka KHumar

har koi madhosh hai duniya bhi kya mai-KHana hai

chashm-e-haq-bin kah rahi hai ye zaban-e-haal se

KHwab hai duniya kisi ka ya koi afsana hai

zarra zarra mein nazar aata hai jis ko husn-e-dost

wo jahan mein be-niyaz-e-kaba-o-but-KHana hai

jis mein jitni hai sharafat us qadar jhukta hai wo

inkisari dar-haqiqat zarf ka paimana hai

dil sahi lekin wo dil koi dilon mein dil nahin

dard se na-ashna ulfat se jo begana hai

be-sabaati-e-jahan par kaun karta hai yaqin

hum samajh kar bhi na ye samjhe ki ye afsana hai

aa rahi hain dil se ghafil ye sadaen dam-ba-dam

daulat-e-duniya ke pichhe kis liye diwana hai

aabru jae watan ki aur tum dekha karo

kya yahi ai nau-jawano himmat-e-mardana hai

jis ka mazhab ban gaya ho KHidmat-e-KHalq-e-KHuda

us ko 'sufi' is se kya ye KHwesh ye begana hai

kaif tari hai dimagh-o-dil pe us ke kis qadar

jam-o-hiddat pi ke 'sufi' kis qadar mastana hai