jis ko ki dastaras hui daman-e-yar tak

jis ko ki dastaras huī dāmān-e-yār tak

gulshan meñ dahr ke vahī pahuñchā bahār tak

juuñ ḳhaar us se to nahīñ hote judā raqīb

mujh ko rasā.ī kyoñ ki ho us gul-ezār tak

abrū kahāñ ne vaz.a nikālī hai ye na.ī

rahtā hai tīr-e-ġhamza mire dil meñ maar tak

pyāre kahīñ nazar na lage aa.ine kī aaj

be-tarah tujh ko rahtā hai vo ai nigār tak

ġhaflat meñ terī kaam hamārā tamām hai

koī kah de itnā yār-e-taġhāful-shi.ār tak

ham sirf dekhne ko haiñ mahrūm aur hai

ġhairoñ ko dastaras tire bos-o-kanār tak

saaqī shitāb jām-e-subūhī pilā mujhe

kyā jāniye bachūñ na bachūñ maiñ ḳhumār tak

dushman hai merī jaan kā aalam tire liye

yaaro koī sunāo ye us dost-dār tak

tujh bazm meñ jo baar 'jahāñdār' ko nahīñ

rahtā hai rahguzar meñ tujhe baar baar tak

jis ko ki dastaras hui daman-e-yar tak

gulshan mein dahr ke wahi pahuncha bahaar tak

jun KHar us se to nahin hote juda raqib

mujh ko rasai kyon ki ho us gul-ezar tak

abru kahan ne waza nikali hai ye nai

rahta hai tir-e-ghamza mere dil mein mar tak

pyare kahin nazar na lage aaine ki aaj

be-tarah tujh ko rahta hai wo ai nigar tak

ghaflat mein teri kaam hamara tamam hai

koi kah de itna yar-e-taghaful-shiar tak

hum sirf dekhne ko hain mahrum aur hai

ghairon ko dastaras tere bos-o-kanar tak

saqi shitab jam-e-subuhi pila mujhe

kya jaaniye bachun na bachun main KHumar tak

dushman hai meri jaan ka aalam tere liye

yaro koi sunao ye us dost-dar tak

tujh bazm mein jo bar 'jahandar' ko nahin

rahta hai rahguzar mein tujhe bar bar tak