jis ko main chand samajhta tha daricha nikla

jis ko maiñ chāñd samajhtā thā darīcha niklā

qaid-e-tanhā.ī meñ jiine kā sahārā niklā

ḳhud jo be-yār-o-madadgār paḌā thā sar-e-rāh

vo mire vāste ik peḌ ghanerā niklā

daf.atan Daal liye maiñ ne laboñ par taale

bazm-e-sad-rang meñ jab zikr tumhārā niklā

huiiñ ḳhāmosh jo atrāf kī sab āvāzeñ

mere andar se koī shor machātā niklā

āsmāñ ne mire raste meñ bichhā.īñ āñkheñ

biich dariyā meñ mire vāste rasta niklā

bas zarā zāviya-e-dīd jo badlā maiñ ne

dushman-e-jāñ bhī mirā chāhne vaalā niklā

yuuñ lagā jaise koī detā hai āvāz mujhe

paaoñ rakhte hī maiñ sahrā ke udhar jā niklā

ālam-e-fikr-o-tajassus pe hai taarī sakta

ek zarre ke hue TukḌe to kyā kyā niklā

jis ke sajde ko jabīñ ḳham huī ḳhurshīdoñ kī

batn se tīra-shabī ke vo ujālā niklā

raat baiThī thī sar-e-rāh bikhere gesū

apnī dīvār se maiñ ban ke hayūlā niklā

aañch halkī sī jo lag jaa.e pighal jaatā hai

terā ehsās bhī 'yāvar' mire jaisā niklā

jis ko main chand samajhta tha daricha nikla

qaid-e-tanhai mein jine ka sahaara nikla

KHud jo be-yar-o-madadgar paDa tha sar-e-rah

wo mere waste ek peD ghanera nikla

dafatan Dal liye main ne labon par tale

bazm-e-sad-rang mein jab zikr tumhaara nikla

huin KHamosh jo atraf ki sab aawazen

mere andar se koi shor machata nikla

aasman ne mere raste mein bichhain aankhen

bich dariya mein mere waste rasta nikla

bas zara zawiya-e-did jo badla main ne

dushman-e-jaan bhi mera chahne wala nikla

yun laga jaise koi deta hai aawaz mujhe

paon rakhte hi main sahra ke udhar ja nikla

aalam-e-fikr-o-tajassus pe hai tari sakta

ek zarre ke hue TukDe to kya kya nikla

jis ke sajde ko jabin KHam hui KHurshidon ki

batn se tira-shabi ke wo ujala nikla

raat baiThi thi sar-e-rah bikhere gesu

apni diwar se main ban ke hayula nikla

aanch halki si jo lag jae pighal jata hai

tera ehsas bhi 'yawar' mere jaisa nikla