jis ko na dil pe naz ho naz tere uThae kyun

jis ko na dil pe naaz ho naaz tire uThā.e kyuuñ

uTh na sake jo āstāñ le ke vo sar jhukā.e kyuuñ

maiñ jo tirā hijāb huuñ kis liye be-naqāb huuñ

parda ho jis kā chaak chaak parde meñ muñh chhupā.e kyuuñ

vo jo na dil meñ bhar sake nūr-o-ziyā kī bijliyāñ

phuul meñ muskurā.e kyuuñ zarre meñ jagmagā.e kyuuñ

husn-e-tabāh-kār hai chāhe kisī bhī shai meñ ho

ho na fareb agar hasīñ koī fareb khaa.e kyuuñ

chhāyā huā hai jab tamām ālam-e-kā.enāt par

gosha-e-tañg-o-tār meñ dil ke vo phir samā.e kyuuñ

hashr na.e uThā.e kyuuñ husn ko gar qarār ho

husn jo be-sukūñ na ho fitne na.e jagā.e kyuuñ

ab to ayaañ hue baġhair jaane na pāoge kabhī

chhup ke mirī nazar se tum ḳhalvat-e-dil meñ aa.e kyuuñ

shauq ho jis kā be-karāñ dil se bhī ho jo bad-gumāñ

apnī nigāh ko bhī vo jalva tirā dikhā.e kyuuñ

pīr-e-muġhāñ shajī.a ho zarf bhī jab vasī.a ho

bāda-kash-e-nigāh-e-mast nashshe meñ laḌkhaḌā.e kyuuñ

jis ko na dil pe naz ho naz tere uThae kyun

uTh na sake jo aastan le ke wo sar jhukae kyun

main jo tera hijab hun kis liye be-naqab hun

parda ho jis ka chaak chaak parde mein munh chhupae kyun

wo jo na dil mein bhar sake nur-o-ziya ki bijliyan

phul mein muskurae kyun zarre mein jagmagae kyun

husn-e-tabah-kar hai chahe kisi bhi shai mein ho

ho na fareb agar hasin koi fareb khae kyun

chhaya hua hai jab tamam aalam-e-kaenat par

gosha-e-tang-o-tar mein dil ke wo phir samae kyun

hashr nae uThae kyun husn ko gar qarar ho

husn jo be-sukun na ho fitne nae jagae kyun

ab to ayan hue baghair jaane na paoge kabhi

chhup ke meri nazar se tum KHalwat-e-dil mein aae kyun

shauq ho jis ka be-karan dil se bhi ho jo bad-guman

apni nigah ko bhi wo jalwa tera dikhae kyun

pir-e-mughan shajia ho zarf bhi jab wasia ho

baada-kash-e-nigah-e-mast nashshe mein laDkhaDae kyun