jis ko sab kahte hain samundar hai

jis ko sab kahte haiñ samundar hai

qatra-e-ashk-e-dīda-e-tar hai

abrū-e-yār dil kā ḳhanjar hai

mizha-e-yār nok-e-nashtar hai

chashm-e-āshiq se do bahe dariyā

ek tasnīm ek kausar hai

ḳhāna-e-dil hai ġhair se ḳhālī

shauq se aao aapkā ghar hai

qata.ī aaj faisla hogā

terī talvār hai mirā sar hai

ab to dhūnī ramā ke baiThe haiñ

dar-e-jānāñ pe apnā bistar hai

tama.a har ik kā dīn-o-īmāñ hai

jis ko dekho vo banda-e-zar hai

ḳhuub dil khol kar jafā kar lo

banda muddat se is kā ḳhūgar hai

baam par jalva-gar hai vo shāyad

kū-e-jānāñ meñ shor-e-mahshar hai

kartā aalam ko aah se barham

lek 'ra.anā' ko yaar kā Dar hai

jis ko sab kahte hain samundar hai

qatra-e-ashk-e-dida-e-tar hai

abru-e-yar dil ka KHanjar hai

mizha-e-yar nok-e-nashtar hai

chashm-e-ashiq se do bahe dariya

ek tasnim ek kausar hai

KHana-e-dil hai ghair se KHali

shauq se aao aapka ghar hai

qatai aaj faisla hoga

teri talwar hai mera sar hai

ab to dhuni rama ke baiThe hain

dar-e-jaanan pe apna bistar hai

tama har ek ka din-o-iman hai

jis ko dekho wo banda-e-zar hai

KHub dil khol kar jafa kar lo

banda muddat se is ka KHugar hai

baam par jalwa-gar hai wo shayad

ku-e-jaanan mein shor-e-mahshar hai

karta aalam ko aah se barham

lek 'rana' ko yar ka Dar hai