jis manzil-e-maqsud pe dam TuT raha hai

jis manzil-e-maqsūd pe dam TuuT rahā hai

lagtā hai mirā ḳhvāb-e-iram TuuT rahā hai

ashkoñ pe mujhe zabt kā ik faḳhr thā lekin

vo sang-e-yaqīñ terī qasam TuuT rahā hai

lailā se kaho rāh-e-junūñ meñ nikal aa.e

sahrā meñ kahīñ qais kā dam TuuT rahā hai

har shauq har ummīd har ik aarzū sālim

ik dil thā tire zer-e-qadam TuuT rahā hai

ik baar mire chāñd ko gahnāyā thā is ne

sūraj pe yuuñ rātoñ kā sitam TuuT rahā hai

ik umr guzārī hai tirī yaad meñ 'kausar'

aa jā ki mirī zulf kā ḳham TuuT rahā hai

jis manzil-e-maqsud pe dam TuT raha hai

lagta hai mera KHwab-e-iram TuT raha hai

ashkon pe mujhe zabt ka ek faKHr tha lekin

wo sang-e-yaqin teri qasam TuT raha hai

laila se kaho rah-e-junun mein nikal aae

sahra mein kahin qais ka dam TuT raha hai

har shauq har ummid har ek aarzu salim

ek dil tha tere zer-e-qadam TuT raha hai

ek bar mere chand ko gahnaya tha is ne

suraj pe yun raaton ka sitam TuT raha hai

ek umr guzari hai teri yaad mein 'kausar'

aa ja ki meri zulf ka KHam TuT raha hai