جس میں ہوں غیر کے مانگے ہوئے جام اے ساقی

جس میں ہوں غیر کے مانگے ہوئے جام اے ساقی

ایسے میخانے کو میرا تو سلام اے ساقی

چاہئے مجھ کو نئے جہد و عمل کی صہبا

مجھ پہ ہے بادۂ دوشینہ حرام اے ساقی

عزم نو جرأت سابق کا سہارا لے کر

پھر بدلنا ہے زمانے کا نظام اے ساقی

جس کی محدود رہے صحن‌ چمن تک پرواز

ایسے شاہیں سے مجھے کچھ نہیں کام اے ساقی

جو بدل لیتے ہیں تسبیح سے پیمانے کو

ایسے بھی ہوتے ہیں رسواکن جام اے ساقی

بیت جائے گی خزاں بیت گئی فصل بہار

ہے یہاں عیش نہ ہے غم ہی مدام اے ساقی

ہو وہ تقلید جنوں یا ہو وہ تقلید خرد

دونوں ہیں رسم غلامی کے امام اے ساقی

گل فروشی کے پس پردہ قفس ہیں صدہا

یاں ہر اک دانہ ہے پروردۂ دام اے ساقی

چشمۂ فیض ہے تیرے ہیں عدو بھی سیراب

ہے تری چشم کرم رحمت عام اے ساقی