jis mein hon ghair ke mange hue jam ai saqi

jis meñ hoñ ġhair ke māñge hue jaam ai saaqī

aise maiḳhāne ko merā to salām ai saaqī

chāhiye mujh ko na.e jehd-o-amal kī sahbā

mujh pe hai bāda-e-doshīnā harām ai saaqī

azm-e-nau jur.at-e-sābiq kā sahārā le kar

phir badalnā hai zamāne kā nizām ai saaqī

jis kī mahdūd rahe sahn-e-chaman tak parvāz

aise shāhīñ se mujhe kuchh nahīñ kaam ai saaqī

jo badal lete haiñ tasbīh se paimāne ko

aise bhī hote haiñ rusvā-kun-e-jām ai saaqī

biit jā.egī ḳhizāñ biit ga.ī fasl-e-bahār

hai yahāñ aish na hai ġham hī mudām ai saaqī

ho vo taqlīd-e-junūñ yā ho vo taqlīd-e-ḳhirad

donoñ haiñ rasm-e-ġhulāmī ke imaam ai saaqī

gul-faroshī ke pas-e-parda qafas haiñ sad.hā

yaañ har ik daana hai parvarda-e-dām ai saaqī

chashma-e-faiz hai tere haiñ adū bhī sairāb

hai tirī chashm-e-karam rahmat-e-ām ai saaqī

jis mein hon ghair ke mange hue jam ai saqi

aise maiKHane ko mera to salam ai saqi

chahiye mujh ko nae jehd-o-amal ki sahba

mujh pe hai baada-e-doshina haram ai saqi

azm-e-nau jurat-e-sabiq ka sahaara le kar

phir badalna hai zamane ka nizam ai saqi

jis ki mahdud rahe sahn-e-chaman tak parwaz

aise shahin se mujhe kuchh nahin kaam ai saqi

jo badal lete hain tasbih se paimane ko

aise bhi hote hain ruswa-kun-e-jam ai saqi

bit jaegi KHizan bit gai fasl-e-bahaar

hai yahan aish na hai gham hi mudam ai saqi

ho wo taqlid-e-junun ya ho wo taqlid-e-KHirad

donon hain rasm-e-ghulami ke imam ai saqi

gul-faroshi ke pas-e-parda qafas hain sadha

yan har ek dana hai parwarda-e-dam ai saqi

chashma-e-faiz hai tere hain adu bhi sairab

hai teri chashm-e-karam rahmat-e-am ai saqi