جس میں رسوائی محبت کی ہو وہ کام نہ کر

جس میں رسوائی محبت کی ہو وہ کام نہ کر

راز کو راز رکھ اے دل تو اسے عام نہ کر

منظر صبح کا اظہار دم شام نہ کر

جلوۂ رخ کو عیاں آ کے سر بام نہ کر

عزم پختہ کو تو صید ہوس خام نہ کر

سر آغاز ہی اندیشۂ انجام نہ کر

میں نے کی آہ تو رک جائے گی رفتار تری

دیکھ مجبور مجھے گردش ایام نہ کر

رات بھر نیند نہیں آئے گی صیاد ہمیں

تذکرہ باغ کے پھولوں کا سر شام نہ کر

کہہ دے حال غم دل آنکھوں ہی آنکھوں میں حبیبؔ

لب سے فریاد نہ کر عشق کو بدنام نہ کر