jis mein ruswai mohabbat ki ho wo kaam na kar

jis meñ rusvā.ī mohabbat kī ho vo kaam na kar

raaz ko raaz rakh ai dil tū ise 'aam na kar

manzar-e-sub.h kā iz.hār dam-e-shām na kar

jalva-e-ruḳh ko 'ayāñ aa ke sar-e-bām na kar

'azm-e-puḳhta ko tū said-e-havas-e-ḳhām na kar

sar-e-āġhāz hī andesha-e-anjām na kar

maiñ ne kī aah to ruk jā.egī raftār tirī

dekh majbūr mujhe gardish-e-ayyām na kar

rāt-bhar niiñd nahīñ aa.egī sayyād hameñ

tazkira baaġh ke phūloñ kā sar-e-shām na kar

kah de hāl-e-ġham-e-dil āñkhoñ hī āñkhoñ meñ 'habīb'

lab se fariyād na kar 'ishq ko badnām na kar

jis mein ruswai mohabbat ki ho wo kaam na kar

raaz ko raaz rakh ai dil tu ise 'am na kar

manzar-e-subh ka izhaar dam-e-sham na kar

jalwa-e-ruKH ko 'ayan aa ke sar-e-baam na kar

'azm-e-puKHta ko tu said-e-hawas-e-KHam na kar

sar-e-aghaz hi andesha-e-anjam na kar

main ne ki aah to ruk jaegi raftar teri

dekh majbur mujhe gardish-e-ayyam na kar

raat-bhar nind nahin aaegi sayyaad hamein

tazkira bagh ke phulon ka sar-e-sham na kar

kah de haal-e-gham-e-dil aankhon hi aankhon mein 'habib'

lab se fariyaad na kar 'ishq ko badnam na kar