jis ne aadam ke tain jaan baKHsha

jis ne aadam ke ta.iiñ jaañ baḳhshā

ḳhizr ko chashma-e-haivāñ baḳhshā

pīr-e-kan.āñ ko diyā dard-e-firāq

yūsuf-e-misr ko zindāñ baḳhshā

taḳht barbād sulaimāñ kā kiyā

dev ko mulk-e-sulemāñ baḳhshā

zīnat aflāk ko dī anjum se

mahr ko nūr-e-daraḳhshāñ baḳhshā

zevar-e-husn kiyā chashm-e-hayā

ishq ko dīda-e-hairāñ baḳhshā

kohkan ko kamar-e-koh diyā

qais ko dasht kā dāmāñ baḳhshā

rañg-o-bū gul ko diyā gulshan meñ

sair-e-bulbul ko gulistāñ baḳhshā

kufr kāfir ke nasīboñ meñ likhā

ahl-e-islām ko īmāñ baḳhshā

roz-e-mīsāq meñ 'hātim' ke ta.iiñ

chashm-e-giryāñ dil-e-biryāñ baḳhshā

jis ne aadam ke tain jaan baKHsha

KHizr ko chashma-e-haiwan baKHsha

pir-e-kanan ko diya dard-e-firaq

yusuf-e-misr ko zindan baKHsha

taKHt barbaad sulaiman ka kiya

dew ko mulk-e-suleman baKHsha

zinat aflak ko di anjum se

mahr ko nur-e-daraKHshan baKHsha

zewar-e-husn kiya chashm-e-haya

ishq ko dida-e-hairan baKHsha

kohkan ko kamar-e-koh diya

qais ko dasht ka daman baKHsha

rang-o-bu gul ko diya gulshan mein

sair-e-bulbul ko gulistan baKHsha

kufr kafir ke nasibon mein likha

ahl-e-islam ko iman baKHsha

roz-e-misaq mein 'hatim' ke tain

chashm-e-giryan dil-e-biryan baKHsha