jis ne shiraaza bikhera umr ka

jis ne shīrāza bikherā umr kā

ye junūñ hāsil hai merā umr kā

ek lamha kyā milā thā hijr ko

kar liyā us ne baserā umr kā

thā diyā lekin use bujhne diyā

chun liyā maiñ ne añdherā umr kā

ek din aa.egā jab āfāq meñ

Duub jā.egā saverā umr kā

kū-ba-kū haiñ hijr kī parchhā.iyāñ

is se hai ābād Derā umr kā

jāntī huuñ chand lamhe saath hai

ho nahīñ saktā vo merā umr kā

'roz' tere hijr meñ masrūr hai

hai yahī ehsān terā umr kā

jis ne shiraaza bikhera umr ka

ye junun hasil hai mera umr ka

ek lamha kya mila tha hijr ko

kar liya us ne basera umr ka

tha diya lekin use bujhne diya

chun liya main ne andhera umr ka

ek din aaega jab aafaq mein

Dub jaega sawera umr ka

ku-ba-ku hain hijr ki parchhaiyan

is se hai aabaad Dera umr ka

jaanti hun chand lamhe sath hai

ho nahin sakta wo mera umr ka

'roz' tere hijr mein masrur hai

hai yahi ehsan tera umr ka