jis pe naraaz hai wo baat to dekh

jis pe nārāz hai vo baat to dekh

vaj.h-e-tark-e-ta’alluqāt to dekh

ye na.e ḳhvāb bhī sar āñkhoñ par

pahle is dil ke vājibāt to dekh

phir kisī ġhaznavī ke tālib haiñ

apne andar ke somnāt to dekh

surḳh ghūñghaT kī oT se ik baar

aa ke ashkoñ-bharī barāt to dekh

ek haiñ 'aam aadmī ke ḳhilāf

hukmarānoñ kī nafsiyāt to dekh

itnā bārīk jaise teġh kī dhaar

apnī jannat kā pul-sirāt to dekh

baa'd meñ sub.h-e-tīra ko ronā

pahle merī safed raat to dekh

chalte haiñ chāñd par magar pahle

merī muTThī meñ kā.enāt to dekh

bastiyāñ aatī jaatī rahtī haiñ

itnā lambā saḌak kā saath to dekh

jis pe naraaz hai wo baat to dekh

wajh-e-tark-e-ta’alluqat to dekh

ye nae KHwab bhi sar aankhon par

pahle is dil ke wajibaat to dekh

phir kisi ghaznawi ke talib hain

apne andar ke somnat to dekh

surKH ghunghaT ki oT se ek bar

aa ke ashkon-bhari baraat to dekh

ek hain 'am aadmi ke KHilaf

hukmaranon ki nafsiyat to dekh

itna barik jaise tegh ki dhaar

apni jannat ka pul-siraat to dekh

ba'd mein subh-e-tira ko rona

pahle meri safed raat to dekh

chalte hain chand par magar pahle

meri muTThi mein kaenat to dekh

bastiyan aati jati rahti hain

itna lamba saDak ka sath to dekh