jis pe neta ki nazar subh rahe sham rahe

jis pe netā kī nazar sub.h rahe shaam rahe

dhoñs meñ us kī na kyoñ gardish-e-ayyām rahe

husn-e-fashion se jo har vaqt khule aam rahe

naujavānoñ ko na kyoñ ishq kā sarsām rahe

sar pe sasurāl meñ har shaḳhs biThātā hai mujhe

jab talak jeb meñ sarkār mirī daam rahe

jis ne lī haath meñ rishvat use pakḌā lekin

hukm thā jin kā vo gum-nām the gum-nām rahe

dekhte jā.iye kuchh duur nahīñ hai vo vaqt

husn saḌkoñ pe rahe ishq sar-e-bām rahe

maar khaa.ī tirī ulfat meñ hamīñ ne ai dost

haa.e qismat ki hamīñ morid-e-ilzām rahe

miT ga.e saare ta.assub ye mazā hai 'nāvak'

shaiḳh ke saath hī jab jail meñ gumnām rahe

jis pe neta ki nazar subh rahe sham rahe

dhons mein us ki na kyon gardish-e-ayyam rahe

husn-e-fashion se jo har waqt khule aam rahe

naujawanon ko na kyon ishq ka sarsam rahe

sar pe sasural mein har shaKHs biThata hai mujhe

jab talak jeb mein sarkar meri dam rahe

jis ne li hath mein rishwat use pakDa lekin

hukm tha jin ka wo gum-nam the gum-nam rahe

dekhte jaiye kuchh dur nahin hai wo waqt

husn saDkon pe rahe ishq sar-e-baam rahe

mar khai teri ulfat mein hamin ne ai dost

hae qismat ki hamin morid-e-ilzam rahe

miT gae sare tassub ye maza hai 'nawak'

shaiKH ke sath hi jab jail mein gumnam rahe