جس قدر بھی زہر دل میں تھا زباں پر آ گیا

جس قدر بھی زہر دل میں تھا زباں پر آ گیا

اس کے لب کھلتے ہی گویا سانپ سا لہرا گیا

رات جو ہم نے سنی تھی وہ تری آواز تھی

صبح لیکن اپنی خوش فہمی پہ رونا آ گیا

اب یہ افسردہ دھندلکے اوڑھ کر سو جائیے

اب تو وعدوں کے جہاں کا چاند بھی گہنا گیا

جانے مایوسی کی کس منزل میں تھے اہل یقیں

پیر کا دھاگا بھی ان کو روشنی دکھلا گیا

دیکھیے ٹکتی ہیں کب تک یہ پرانی کھڑکیاں

آج سڑکوں کا تمدن ان کا دل دہلا گیا

آؤ ناداںؔ آج اس ناسور کا ماتم کریں

جو خراج زندگی لے کر بھی ہم کو کھا گیا