جس روز سے سودا تری الفت کا ہے سر میں

جس روز سے سودا تری الفت کا ہے سر میں

ہستی کی بھی ہستی نہ رہی میری نظر میں

اے فکر معیشت تجھے کیا کہہ کے میں کوسوں

دو روز بھی رہنے نہ دیا چین سے گھر میں

احباب شب غم مری تصویر نہ کھینچیں

رہنے دیں اتر جائے گی یہ رات ہی بھر میں

اندھیر کیا تو نے یہ کیا بے خودیٔ شوق

گھر سے ہمیں باہر کیا وہ آئے جو گھر میں

اب عکس سے بھی آنکھ ملائی نہیں جاتی

کھوئے گئے اس طرح وہ آئینے کے گھر میں

تارے نہیں یہ آخر شب چرخ پہ صفدرؔ

جو پھول نظر آتے ہیں دامان سحر میں