jis roz se sauda teri ulfat ka hai sar mein

jis roz se saudā tirī ulfat kā hai sar meñ

hastī kī bhī hastī na rahī merī nazar meñ

ai fikr-e-ma.īshat tujhe kyā kah ke maiñ kosūñ

do roz bhī rahne na diyā chain se ghar meñ

ahbāb shab-e-ġham mirī tasvīr na khīñcheñ

rahne deñ utar jā.egī ye raat hī bhar meñ

andher kiyā tū ne ye kyā be-ḳhudī-e-shauq

ghar se hameñ bāhar kiyā vo aa.e jo ghar meñ

ab aks se bhī aañkh milā.ī nahīñ jaatī

kho.e ga.e is tarah vo ā.īne ke ghar meñ

taare nahīñ ye āḳhir-e-shab charḳh pe 'safdar'

jo phuul nazar aate haiñ dāmān-e-sahar meñ

jis roz se sauda teri ulfat ka hai sar mein

hasti ki bhi hasti na rahi meri nazar mein

ai fikr-e-maishat tujhe kya kah ke main kosun

do roz bhi rahne na diya chain se ghar mein

ahbab shab-e-gham meri taswir na khinchen

rahne den utar jaegi ye raat hi bhar mein

andher kiya tu ne ye kya be-KHudi-e-shauq

ghar se hamein bahar kiya wo aae jo ghar mein

ab aks se bhi aankh milai nahin jati

khoe gae is tarah wo aaine ke ghar mein

tare nahin ye aaKHir-e-shab charKH pe 'safdar'

jo phul nazar aate hain daman-e-sahar mein