jis samt nazar jae mela nazar aata hai

jis samt nazar jaa.e melā nazar aatā hai

har aadmī is par bhī tanhā nazar aatā hai

saudā-e-dil-o-dīñ yā saudā-e-dil-o-duniyā

āshiq ko to donoñ meñ ghāTā nazar aatā hai

andhoñ ko tire ai husn ab mil ga.ī bīnā.ī

ab ishq kā har jazba nañgā nazar aatā hai

pastī se agar dekho nīchā bhī hai kuchh ūñchā

ūñchā bhī bulandī se nīchā nazar aatā hai

kyā shikva ta.aqqul ke ḳhāmosh tahayyur se

jab apnā tasavvur bhī gūñgā nazar aatā hai

ai nāz-e-ḳhud-ārā.ī de zarf ko pahnā.ī

ghuTtā huā qatre meñ dariyā nazar aatā hai

rahmat bhī tirī shāyad kuchh kaan kī ūñchī hai

insāf bhī terā kuchh andhā nazar aatā hai

nālāñ haiñ 'jamīl' apnī āñkhoñ se ki ab un ko

sūraj kā pujārī bhī andhā nazar aatā hai

jis samt nazar jae mela nazar aata hai

har aadmi is par bhi tanha nazar aata hai

sauda-e-dil-o-din ya sauda-e-dil-o-duniya

aashiq ko to donon mein ghaTa nazar aata hai

andhon ko tere ai husn ab mil gai binai

ab ishq ka har jazba nanga nazar aata hai

pasti se agar dekho nicha bhi hai kuchh uncha

uncha bhi bulandi se nicha nazar aata hai

kya shikwa taqqul ke KHamosh tahayyur se

jab apna tasawwur bhi gunga nazar aata hai

ai naz-e-KHud-arai de zarf ko pahnai

ghuTta hua qatre mein dariya nazar aata hai

rahmat bhi teri shayad kuchh kan ki unchi hai

insaf bhi tera kuchh andha nazar aata hai

nalan hain 'jamil' apni aankhon se ki ab un ko

suraj ka pujari bhi andha nazar aata hai