jis se bhi humne dil-lagi ki hai

jis se bhī ham ne dil-lagī kī hai

us ne hī mujh se be-ruḳhī kī hai

kyā batā.eñ ki kaise haiñ ham log

ham ne apnoñ se dushmanī kī hai

jab guloñ se hamārī ban na sakī

ham ne kāñToñ se dostī kī hai

roz ik imtihān ho jaise

ye kahānī bhī zindagī kī hai

jo vafā ham se kar nahīñ paa.e

ham ne un kī bhī pairvī kī hai

dar-ba-dar aaj phirte haiñ ham jo

ye sazā bhī to 'ishq hī kī hai

apne qismat se jo laḌe 'minhāj'

itnī himmat kahāñ kisī kī hai

jis se bhi hum ne dil-lagi ki hai

us ne hi mujh se be-ruKHi ki hai

kya bataen ki kaise hain hum log

hum ne apnon se dushmani ki hai

jab gulon se hamari ban na saki

hum ne kanTon se dosti ki hai

roz ek imtihan ho jaise

ye kahani bhi zindagi ki hai

jo wafa hum se kar nahin pae

hum ne un ki bhi pairwi ki hai

dar-ba-dar aaj phirte hain hum jo

ye saza bhi to 'ishq hi ki hai

apne qismat se jo laDe 'minhaj'

itni himmat kahan kisi ki hai