jis se wafa ki thi umid usne ada kiya ye haq

jis se vafā kī thī umiid us ne adā kiyā ye haq

auroñ se irtibāt kī aur mujhe diyā qalaq

terī jafā vafā sahī merī vafā jafā sahī

ḳhuun kisī kā bhī nahīñ to ye batā hai kyā shafaq

mus.haf-e-ruḳh hī dard thā aur na thā koī ḳhayāl

'ishq ne ḳhud paḌhā diyā husn kā ek ik varaq

aur to haiñ rivāyateñ maz.hab-e-'ishq hai sahīh

roz 'atā ho shauq se vahī na.ī nayā sabaq

jazba-e-dil ġhalat sahī kuchh to subūt-e-ishq dekh

tafta jigar havās gum ḳhīra nazar kaleja shaq

'sehr' to mujtahid hai ḳhud kyuuñ ho muqallid aur kā

bahr o radīf o qāfiya hai fann-e-shā.irī adaq

jis se wafa ki thi umid us ne ada kiya ye haq

auron se irtibaat ki aur mujhe diya qalaq

teri jafa wafa sahi meri wafa jafa sahi

KHun kisi ka bhi nahin to ye bata hai kya shafaq

mushaf-e-ruKH hi dard tha aur na tha koi KHayal

'ishq ne KHud paDha diya husn ka ek ek waraq

aur to hain riwayaten mazhab-e-'ishq hai sahih

roz 'ata ho shauq se wahi nai naya sabaq

jazba-e-dil ghalat sahi kuchh to subut-e-ishq dekh

tafta jigar hawas gum KHira nazar kaleja shaq

'sehr' to mujtahid hai KHud kyun ho muqallid aur ka

bahr o radif o qafiya hai fann-e-shairi adaq