جس سے زمانہ سلسلۂ خواب لے گیا

جس سے زمانہ سلسلۂ خواب لے گیا

میں دل کی انجمن میں وہ مہتاب لے گیا

الزام بے خودی ہمیں منظور ہے مگر

یہ تو بتاؤ کون مئے ناب لے گیا

جس سے زمانہ سازوں کے چہرے اتر گئے

وہ حوصلے کہاں دل بیتاب لے گیا

میں آگہی کے زہر سے لبریز جام تھا

اک دست اشتیاق مجھے داب لے گیا

اشکوں کو روک خود ہی نہ غرقاب ہو کہیں

مژگاں کو کھول شہر کو سیلاب لے گیا

میرے لئے وجود کی چادر کو چھوڑ کر

وہ کون ہے جو ریشم و کمخواب لے گیا

مدہوش جس سے سارا زمانہ ہوا خلشؔ

ساقی کہاں وہ ساغر نایاب لے گیا