جس سکوت مستقل پر تجھ کو اتنا ناز ہے

جس سکوت مستقل پر تجھ کو اتنا ناز ہے

بے خبر وہ بھی تو رسوائی کا اک انداز ہے

آپ اسے حرف جنوں سمجھیں کہ حرف آگہی

یہ بہر صورت شعور درد کی آواز ہے

کتنے زخموں کا بھرم اک بے زبانی کی ادا

کتنی آوازوں کا پردہ اک سکوت ناز ہے

لب ہی لب کی بھیڑ ہے مے خانۂ ہستی میں آج

تشنگی ہی تشنگی اب وقت کی آواز ہے

تم کو ہوتا ہے جو کانٹوں پر بھی پھولوں کا گماں

وہ بھی شائستہ نگاہی کا مری اعجاز ہے

کیا خبر کب چھین لے مجھ سے ترے غم کی اساس

ان دنوں کچھ جارحانہ وقت کا انداز ہے

اس طرح لپٹی ہے دل سے تیری یادوں کی لکیر

جیسے یہ بھی روشنئ زندگی کا راز ہے

جس نے دیوانہ بنا رکھا ہے سارے شہر کو

وہ تکلم کا ترے سنبھلا ہوا انداز ہے

بن پڑے اے ناظمؔ محزوں تو چل اس کے حضور

شہر میں بس اک وہی عیسیٰ نفس دم ساز ہے