jis sukut-e-mustaqil par tujhko itna naz hai

jis sukūt-e-mustaqil par tujh ko itnā naaz hai

be-ḳhabar vo bhī to rusvā.ī kā ik andāz hai

aap ise harf-e-junūñ samjheñ ki harf-e-āgahī

ye bahar-sūrat shu.ūr-e-dard kī āvāz hai

kitne zaḳhmoñ kā bharam ik be-zabānī kī adā

kitnī āvāzoñ kā parda ik sukūt-e-nāz hai

lab hī lab kī bhiiḌ hai mai-ḳhāna-e-hastī meñ aaj

tishnagī hī tishnagī ab vaqt kī āvāz hai

tum ko hotā hai jo kāñToñ par bhī phūloñ kā gumāñ

vo bhī shā.ista-nigāhī kā mirī e.ajāz hai

kyā ḳhabar kab chhīn le mujh se tire ġham kī asaas

in dinoñ kuchh jārehāna vaqt kā andāz hai

is tarah lipTī hai dil se terī yādoñ kī lakīr

jaise ye bhī raushnī-e-zindagī kā raaz hai

jis ne dīvāna banā rakkhā hai saare shahr ko

vo takallum kā tire sañbhlā huā andāz hai

ban paḌe ai 'nāzim'-e-mahzūñ to chal us ke huzūr

shahr meñ bas ik vahī īsā-nafas dam-sāz hai

jis sukut-e-mustaqil par tujh ko itna naz hai

be-KHabar wo bhi to ruswai ka ek andaz hai

aap ise harf-e-junun samjhen ki harf-e-agahi

ye bahar-surat shuur-e-dard ki aawaz hai

kitne zaKHmon ka bharam ek be-zabani ki ada

kitni aawazon ka parda ek sukut-e-naz hai

lab hi lab ki bhiD hai mai-KHana-e-hasti mein aaj

tishnagi hi tishnagi ab waqt ki aawaz hai

tum ko hota hai jo kanTon par bhi phulon ka guman

wo bhi shaista-nigahi ka meri eajaz hai

kya KHabar kab chhin le mujh se tere gham ki asas

in dinon kuchh jarehana waqt ka andaz hai

is tarah lipTi hai dil se teri yaadon ki lakir

jaise ye bhi raushni-e-zindagi ka raaz hai

jis ne diwana bana rakkha hai sare shahr ko

wo takallum ka tere sanbhla hua andaz hai

ban paDe ai 'nazim'-e-mahzun to chal us ke huzur

shahr mein bas ek wahi isa-nafas dam-saz hai