jis taraf chahun pahunch jaun masafat kaisi

jis taraf chāhūñ pahuñch jā.ūñ masāfat kaisī

maiñ to āvāz huuñ āvāz kī hijrat kaisī

sunñe vāloñ kī samā.at ga.ī goyā.ī bhī

qissa-go tū ne sunā.ī thī hikāyat kaisī

ham junūñ vaale haiñ ham se kabhī pūchho pyāre

dasht kahte haiñ kise dasht kī vahshat kaisī

aap ke ḳhauf se kuchh haath baḌhe haiñ lekin

dast-e-majbūr kī sahmī huī bai.at kaisī

phir na.e saal kī sarhad pe khaḌe haiñ ham log

raakh ho jā.egā ye saal bhī hairat kaisī

aur kuchh zaḳhm mire dil ke havāle mirī jaañ

ye mohabbat hai mohabbat meñ shikāyat kaisī

maiñ kisī aañkh se chhalkā huā aañsū huuñ 'nabīl'

merī tā.īd hī kyā merī baġhāvat kaisī

jis taraf chahun pahunch jaun masafat kaisi

main to aawaz hun aawaz ki hijrat kaisi

sunne walon ki samaat gai goyai bhi

qissa-go tu ne sunai thi hikayat kaisi

hum junun wale hain hum se kabhi puchho pyare

dasht kahte hain kise dasht ki wahshat kaisi

aap ke KHauf se kuchh hath baDhe hain lekin

dast-e-majbur ki sahmi hui baiat kaisi

phir nae sal ki sarhad pe khaDe hain hum log

rakh ho jaega ye sal bhi hairat kaisi

aur kuchh zaKHm mere dil ke hawale meri jaan

ye mohabbat hai mohabbat mein shikayat kaisi

main kisi aankh se chhalka hua aansu hun 'nabil'

meri taid hi kya meri baghawat kaisi