jis taraf le ke hawa jati hai chal dete hain

jis taraf le ke havā jaatī hai chal dete haiñ

phuul chun lete haiñ kāñToñ ko masal dete haiñ

ḳhair-ḳhvāhī ke talabgār nahīñ ham logo

koī mushkil ho to hālāt kā hal dete haiñ

zālimoñ ko bhī sikhāte haiñ mohabbat karnī

dil ko ehsās ko zehnoñ ko badal dete haiñ

ḳhaak sahrā kī nahīñ aql uḌāyā kartī

dāvat-e-fikr-o-nazar dasht-o-jabal dete haiñ

kaf-e-afsos to aate nahīñ malnā ham ko

apne hī dil kā lahū haath pe mal dete haiñ

chāhne vāloñ pe hargiz na bharosa karnā

zindagī māñgne vāloñ ko ajal dete haiñ

shā.iroñ ko koī unvān-e-ġhazal de 'vājid'

ham ġhazal kah ke bhī paiġhām-e-amal dete haiñ

jis taraf le ke hawa jati hai chal dete hain

phul chun lete hain kanTon ko masal dete hain

KHair-KHwahi ke talabgar nahin hum logo

koi mushkil ho to haalat ka hal dete hain

zalimon ko bhi sikhate hain mohabbat karni

dil ko ehsas ko zehnon ko badal dete hain

KHak sahra ki nahin aql uDaya karti

dawat-e-fikr-o-nazar dasht-o-jabal dete hain

kaf-e-afsos to aate nahin malna hum ko

apne hi dil ka lahu hath pe mal dete hain

chahne walon pe hargiz na bharosa karna

zindagi mangne walon ko ajal dete hain

shairon ko koi unwan-e-ghazal de 'wajid'

hum ghazal kah ke bhi paigham-e-amal dete hain